Middag hos Dulka.

Dulka lagar fin middag for oss.
Suppe, kalkunrett, kyllingrett, gratinerte pannekaker,
dessert og kaffi.

Grønsaksuppe, salat med tomat, Fylte kalkunfiletar,
Kylling med steikte poteter og gulrøter.

Helene 10 år!

I dag fyller Helene i Sola 10 år. Gratulerer!!
Ho feirer dagen på fjellet i vinterferien, i Rauland.
Helene brukar å ta ut av oppvaskmaskina når ho kjem frå skulen.
Så er det klart til å rydde oppvasken etter middagen.
FLINK JENTE!

Kveldstur

Marthea prøver ut apparata i Farkvamen barnehage.

Besøk i Aasentunet

I går tok vi gjestane med til Aasentunet.
Der fekk dei sjå film og lære om han Ivar og nynorsken.

Besøk av slekt.

I går kom Olaug, Frode, Marthea og Mathias
frå Steinhovden. Kjekt å ha dei her nokre dagar.

Marthea passar broren sin. Det likar han godt.

Marthea er god på datamaskina.
Superblink er kjekt.

It´s Thinking Day

Til alle speidarjenter!
To all girl guides!


Til lykke med Tenkedagen!
Good luck for the Thinking Day!

Spesiell hilsen til Vickie i Wausau
og Kari i Stavanger.( I Sola)


Dette bokmerket fekk vi lage oss i går
på speidarmøtet ( scout meeting).
Det er på geiteskinn.

Frokost på tenkedagen

På tenkedagen, eigentleg 22. februar som er fødselsdagen til Lady og Lord Baden Powell, har vi fornying av speiderløftet, vi syng speidersangar og har ymse anna program.
I dag har vi laga kvar sitt bokmerke av geiteskinn frå Målselv.

13 damer frå Ørsta og Volda var samla hos Bjørg Holmin i Volda klokka 11 i dag, lørdag.

Turid og Bjørg

Innvandrarkvinnetreff i februar

Tema denne gongen var voggesongar og barnesongar.
To skulejenter viste oss klapperegler, og
førskulelærar Wencke song fleire norske voggesongar. Nokre var nord-norske.
Somaliadamene stilte opp og song.
Det gjorde og dei norske damene.
Vi fann at Fader Jakob er internasjonal.
Bro bro brille-leiken ga god stemning.
Til avslutning song vi Fager kveldssol smiler.

Pensjonisttreff

Også i år vart vi pensjonistane innbodne til treff på Velle skule. Det vart ei koseleg samling på lærarrommet, som vanleg fint pynta og med god mat, tillaga av dei kollegaene våre som framleis jobbar der. Stor takk til dykk!!
Vi set stor pris på å samlast. Nokre sa at " når vi ser desse ansikta rundt oss , er det som vi er her igjen og har friminutt, berre ventar på at skuleklokka skal ringje".
Sjølvsagt fekk vi omvisning i det nye tilbygget. Vi vart imponerte! Rektor viste oss rundt. Vi tok heis frå kjellar til loft.

Her ser vi det nye samlingsrommet. Her er ikkje problem å få plass til 300 elevar og tilsette
på kvar sin stol. Songstund her er noko heilt anna enn det var i storklasserommet før.
No har dei ikkje berre songstund, men og dansestund. Det er nok eit syn å sjå alle 250 elevane utfolde seg med danseglede når dei kjem saman etter å ha øvt inn dansane klassevis.

Vi syntest klassereglane var gode, særleg nr.5. Her er vi på det nye skulekjøkkenet.
Her var sløydsalen før. Dette er topp moderne.

Her prøver vi dei nye pultane. Mellom to pultar er eit felles skap. Veldig praktisk, synest vi.

Reidun rektor viser oss "smarttavla" som førebels er den
einaste i sitt slag i ørstaskulen. Ho er digital og kan brukast
på svært mange måtar.

Tavla står i eit hjørne av det nye mediateket som er eit stort rom. Her skal vere datamaskiner og fagbøker.

Mange flotte, nye klasserom har dei og fått.

Gratulerer med flott skule!

Boknafisk til middag

Så kom den bebuda boknafisken på bordet. Med ribbefeitt, raspa gulrot og poteter. Nydeleg!

Mamma kom heim att

Mamma Ingunn er på korsamling og -konsert i helga.

Bursdag for tante Turid.

Vertinna fekk eit sjal, strikka av Bjørg. Og tante Turid som har bursdag 17. fekk mange gåver.
Her med isskrape til bilen.

God mat

Vi fekk mykje god mat. Torskehaud og kams om fredagskvelden då vi kom. Laurdag var det julemiddag eller " spikjekjøt", som Magne sa. Og i dag, sundag skal det vere boknafisk med ribbefeitt. Slikt hadde ikkje gått bra i lengda. Til kvelds serverte Kirsti kabaret.

Vår gamle campingvogn.

Den første campingvogna vi eigde, står her bak huset til Kirsti og Magne.
No lurer Hans på om han skal ta og pusse ho opp.
Kirsti vil betale for å få ho vekk.

Utegangarsauene til Magne

Vi gjekk tur bort til Jordmorgarden. Der såg vi sauene som går ute.
Det snøa tett. 40 cm snø på Lepsøya er uvanleg.

På besøk i helga.

Vi er på besøk hos Kirsti og Magne.
Dei er blitt store Mari, Andreas og Synne.
Laurdag til middag var alle hos Kirsti.

Kaffibesøk

I ettermiddag hadde vi besøk av Arnhild og Arne.
Dei hadde med to barnebarn, tvillingar 5år.
Det var livlege karar,
men då barne tv begynte,
vart det stilt.

Brev frå fadderbarnet.

I dag fekk eg brev frå fadderbarnet mitt. På spansk.
Det er ei jente, 10 år som bur i SOS-barneby i Chile.
Eg sende henne ein CD til jul med Julekveldsvisa
av Alf Prøysen, den spanske versjonen. Den likte ho.
Eg forstår det meste av det ho skriv.
Kjekt å ha nytte av spansklæringa.

Dåpsklutkomiteen

I går kveld hadde vi møte i dåpsklutkomiteen her hos meg.
Vi er tre damer som arbeider for å skaffe pengar til dåpsklutane
som blir brukte i kyrkja.
No utfordrar vi foreiningar i Ørsta for 2010. I år betalar Inner Wheel.
Kluten som barnet blir tørka med ved dåpen, får barnet som gåve og minne.
Desse klutane kjøper vi frå Madagaskar. Dei er handsydde av kvinner der.
Dei har holfald og eit motiv, ei brodert due.
Dermed er vi med å gje desse kvinnene arbeid og inntekt.
Det går med 100 klutar i eitt år, og dei kostar 29,- kr pr. stk.
Vi har hatt dei i to år, og hittil har det gått fint med finansieringa.

Snø og sol

I dag kom sola over fjellet klokka halv ti.
Her skin sola frå aust.
Sol heile dagen.
Det er nokre kuldegrader om natta.

Fem år!

Mathias på Sola
feirer fem år 10. februar.
Vi gratulerer!

Håper du får ein fin
bursdag!

Spanskklubben

Vi er 7 damer som lærer oss spansk i lag. Vi møtest kvar eller annakvar måndag.
I kveld hadde vi lærar. Det er ein som er frå Chile. Han er saman med oss av og til.
Det er veldig nyttig å få hjelp av ein som kan språket.
Vi brukar same lærebøkene som på Ungdomsskulen. No held vi på med Amigos tres.
Vi har det ganske triveleg.
Her er vi på tur i Spania i april 2008.

Besøk på morsdagen

Åshild, Agnar og Amanda frå Rovde kom på besøk. Her vert morsdagskaka sett pris på. Ho smakte godt!

På årsmøte

Fredag og laurdag var eg på fylkesårsmøte på Vestnes i lag med 3 andre damer frå Ørsta.
Vi køyrde i lag, og prata mykje.
Om fredagskvelden høyrde vi foredrag om "Klimaendringene, angår de oss ?" Vi hadde mange spørsmål til foredragshaldaren. Det var kjempeinteressant.
Laurdag fortalde leiaren på eit asylmottak om "Erfaringer som leder for asylmottak". Det var og lærerikt. Elles var det kjekt å møte damene frå heile fylket.

Morsdag

Eg kom att frå Vestnes i ettermiddag. Eg har vore der på årsmøte for KrF Kvinner.
Då hadde Hans jamen kjøpt blomster og kake til morsdagen. Ikkje verst, vel?

På Folkehøgskulen

I går kveld var vi på Folkehøgskulen og høyrde på redaktøren i Vagabond som snakka om å reise.
Skal ein forstå kulturen i landet der ein reiser, er det ikkje nok å lese reisebøker, sa han. Då må ein lese skjønnlitteratur frå landet. Og så må ein komme i kontakt med dei som bur der og snakke med dei. Han heldt på ein heil time, og det var interessant!
Mange hadde møtt fram, og det var kjekt å møte folk vi har reist saman med på skulen sine turar.
Kaffi og kaker var å få kjøpt.
Vi fekk og ein gjennomgang av tilboda Møre Folkehøgskule har dette året.
Kanskje "Eventyrlege Kapadokia og magiske Istanbul" i oktober kunne vere aktuelt?

Omsettingsproblem

Eg må be lesarane mine om orsaking for at eg av og til brukar
bokmålsord. Det har ein grunn: Når eg tenkjer på at mine vener i USA skal lese det eg skriv, sjekkar eg omsettinga på engelsk. Og viss det er alt for gale, må eg bruke bokmålsordet. Omsettaren har problem med nynorsk.

Besøk hos slekt.

Denne helga har vi vore på besøk til slekta. Vi har besøkt Solrunn og John,
Frode og Olaug, og vi budde hos Arne og Gunn.
Laurdag var det stor grautmiddag hos Gunn og Arne. Der var også Frode med familie,
Bjarte, Camilla og Johanne og kusine Solveig.