Gratulerer Kari!

I dag fyller Kari 46 år. Vi her i Rekkevikløkka gratulerer!

Huset blir måla og besøk frå Sola

No blei veret så bra at målaren kunne gjere jobben.
Sørveggen er ganske stor, så godt å sleppe å klatre der.

I dag klokka halv ti henta vi Helene og Mathias frå Sola på Torp flyplass.
Reisa hadde gått fint.

Så vart det ny tur for å vise fram Larvik.
Vi spaserer på strandpromenaden og besøkjer Dag som jobbar i Maribell.
No i helga ligg det er sivbåt ved Fritsø Brygge.
Det er Heyerdahlfamilien som har hatt feiring av bursdagar.
To monument har vorte avduka i byen.

Vi sit på trappa ved Fritsø Brygge som er eit leilegheitsbygg her.
Bakom viser Bølgen kulturhus.

Laurdagsgodt må kjøpast inn.

Mathias fann turnapparat fleire stader. Og mange fine steinar å balansere på.

Om kvelden laga vi pizza. Då inviterte vi Dag.
Ut på kvelden kom Elin, Sunniva, Johanne og Inga tilbake
frå Gøteborg der dei hadde vore på tur i tre dagar.

Kirsti og Turid på besøk

Hans sine søstre kom køyrande frå Lepsøya og Måløy sundag.
Dei kom til middag og eg hadde laga fårefrikasse.

Neste dag var vi på rundtur i Larvik. Sunniva var gaid igjen.
Men noke kulturhus kom ikkje på tale før butikkrunden var unnagjort.
Etter besøk i ein veldig kjekk klesbutikk, bokhandel og garnbutikk,
var gjestane klare for kulturen og byen.
Her ved kulturhuset med Superspeed i bakgrunnen.

Vi tok tur til Stavern for å finne ein koseleg plass å ete lunsj.
Og lunsjen var nydeleg både for auge og gane.

Då tantene kom, heldt eg på med å strikke på kvite halvstrømper til Sunniva.
Då skjedde det at dei vart inspirerte til å strikke dei og.
Og vi måtte besøkje ein garnbutikk.
Kirsti sa ho hadde ikkje strikka på 30 år.
Turid kunne lære oss å strikke ein type kilehæl.

Strikkinga smitta straks også til den neste generasjon.
"Så kjekt å strikke", sa dei alle.

Ein tremenning som Hans og søstrene har her i Larvik,
vart invitert til oss neste formiddag. Han og kona bur i gåavstand frå oss.

Lunsj i hamna

Vi har hatt ein dag med skodde, men likevel opplett.
Elin og Dag arbeider i båten med maling og innreiing.
Vi besteforeldra ordna med formiddagsmat til dei og oss.
Her er vi på kaia der Maribell ligg.
Inga kosa seg med å teikne paradis.
Johanne hadde med ei veninne, og Sunniva var på byen med sine venner.
No er det haustferie!
I morgon ventar vi tante Turid og tante Kirsti.

Sundagstur til Vardeåsen

I fint ver hadde vi tur til Kjerringvik og derifrå til fots gjennom skogen til ein ås
der vi kunne sjå 360 grader rundt. Flott utsikt over Tjølling og Sandefjorden.
Med på turen var Elin og Dag, Sunniva, Inga, veninna Mina, fire besteforeldre og ein onkel.

Inga og Mina hadde mange ekstraomvegar, mykje leik og moro.

Besøk av Kirsten og Ottar.

I nydeleg solskinn kom svigerinne Kirsten og bror Ottar på besøk om fredagen.
Det var regn på Vestlandet, sa dei. Dei kom frå Bergen.
Det første vi viste dei var badestranda vår i Rekkevikbukta, 5 min å gå.
Laurdagen hadde vi omvisning i Larvik med Sunniva som gaid.

Dag jobbar i båten sin Maribell som ligg i trebåthamna i Larvik sentrum.
Og vi var sjølvsagt på besøk der då vi spaserte i Larvik.

Dei er stolte av det flotte spahotellet som er kåra til det beste spahotellet i Noreg,
Farris bad. Det er heilt nytt.

Spasertur på Tollerodden med monument over Thor Heyerdahl og Collin Archer.
Det var der dei bygde mange redningsskøyter for 100 år sidan.

Sunniva var flink gaid.

Kulturhuset Bølgen er eit kjempeflott anlegg med mange kinosalar, restaurant og kunstutstillingar. Vi spaserte litt der innadørs. Eit kor hadde gratiskonsert.

Og så var vi ein tur til Stavern, spaserte i gatene og i Karl Johansvern.

Laurdagkveld med kylling i Rekkevikløkka. Sundag etter frukost reiste
gjestane. Mykje takk for besøket.

Dugnad og kaffilatte.

På laurdag hadde vi to polske arbeidarar som kutta eit hjørne av verandaen.
Det vart mykje opnare og betre utfor garasjen.
At der var så trangt, kom nok av at vi hadde flytta garasjen lenger bak
No skal vi snart til med steinlegging på uteområdet.
Og så står det føre å male huset. Det er no berre grunna.

På laurdag frå klokka ni til elleve var det dugnad på Rekkevikløkka. Bra ver.
Vi hadde fått brev med innkalling frå styret i velforeininga.
På fellesområdet skulle gjerast kantslått, lukast rundt leikeapparata og rakast.
Det var flest menn som stilte opp, men nokre damer og.
Der stod ingenting om kaffi i innkallinga, så eg steikte nokre sveler og kokte kaffi og hadde med.
Svelene fall i god smak, og det blei ei hyggjeleg kaffistund etter dugnaden.
Kjekt å treffe naboane. Det er flest unge folk, men og nokre eldre. Vi er kanskje dei eldste.
Hans stilte med tilhengaren og køyrde til søppelplassen (Grinda) med hageavfallet.
Etterpå kalla vi inn Elin og jentene, besteveninna til Inga og, for å ete opp resten av svelene.
Dag jobba i båten.

I dag sundag, har vi vore i kyrkja til høgmesse. Der var eitt barn til dåpen. Ein gut som heiter Linus. Det har regna heile dagen. Sunniva og Johanne kom hit for å gjere skulearbeid. Heime hos dei var det for uroleg, for der var det rydding og utskifting av sommar-, vinterty og ditto sengety. Så dermed fekk vi to gjestar til middag. Kjekt! Til kaffi hadde vi invitert dei andre besteforeldra. Sunniva laga kaffelatte til oss, med karamellsmak. Eg er ikkje så god på slikt, så greitt å få det servert.

Malehjelp

Vi fekk to dagar med fint ver i forrige veke. Då fekk vi måla garasjeporten. Johanne tok jobben.
Det har vore mykje regn og storm i siste del av august og no i september her i Larvik. Dag har fleire gonger måtta sjå til Maribell ved nattetid. Vi har fått eit godt hus og merkar ikkje så mykje til stormen når vi er innadørs. Men vi synest ikkje reklamen for det gode klimaet her held seg heilt opp att. I kveld har eg vore på speidar i lag med Inga. Dei hadde planlagt grilling ute, men vi måtte berre bruke kyrkjekjøkkenet og varme pølsene der. Stemninga var god for det.
I går var Hans og Asle på ein ekspedisjon til Oslo. Asle kjøpte ein bil som han hadde funne på internett. Hans er framleis i Arendal og kjem heimatt i morgon.
I dag er det val. Vi har førehandsstemt i Ørsta, for det var der vi hadde adr. 30 juni.
Så no fylgjer eg med i Mørenytt på Nett.

Besøk i Arendal

Sundag var vi ein tur til Arendal. Nydeleg fårikålmiddag vart servert.
I underetasjen der Eili bur, kom vår gamle oppvaskmaskin inn,
men er endå ikkje kome på plass i benken.

Og vertsfolket som tok godt i mot oss.

Asle sagar ned store tre i nabohagen. Dei står for nær gjerdet.
Han må klatre opp og sage greinene ei for ei. Og så heise dei ned,
så dei ikkje skadar uthuset til naboen.
Eg syntest det såg ut til å vere ein farleg jobb. Men han sikrar seg godt, seier han.

På pizzarestaurant

Sist laurdag kveld var vi saman på pizzarestaurant i Larvik sentrum.
Alle fire besteforeldra var med.
Gode pizzaer og hyggjeleg selskap!
Og ikkje minst lettvindt for Elin og Sunniva som var klar til å reise
til Frankrike neste dag. Dei er på ei vekes ridetur i Loiredalen denne veka.
Johanne ser fram til at når ho er konfirmant, er det hennar tur å komme på ein liknande tur.

Besøk i Steinhovden

Vi besøkte bror Arne i Steinhovden. Dessverre var Gunn i Bergen,
men ho har lova å komme ein tur til Larvik.
Her viser Arne oss det nye huset han held på å byggje. No held han på med innreiing.
Det blir eit kjekt hus bygd med moderne materialer, varme i golvet, fint bad og vaskerom,
stor stove med kjøkken og stor hems.

Så spaserte vi på litt gjengrodde stier, den gamle bygdevegen.
Det var skulevegen min i barndommen.
Det er utruleg kor store trea er blitt!

Barndomsheimen min er no brukt til utleigehus.
No er det tomt. Frode Bonde har drive med oppussing.
Det er ein fin flat gard. Far min dyrka han opp frå myr med skog på.
No er det tredje generasjon som driv her.

Hytta som aller først var hønsehus, er no utleigd og.
Kyrne var på sommarbeite mange plassar i bygda.
Vi fekk vere med å hente nokre som hadde kome på feil side av gjerdet,
og kosa seg på naboen si mark.

Eg var på besøk hos kusine Solveig. Ho blir 90 år til våren.
Det er ikkje til å tru. Ho dekka kaffibord til meg, og vi hadde ein koseleg prat.
Solveig er fadder på meg.

Hans og eg besøkte og tante Inga i Redalen.
Ho hadde dekka bordet og kokt kaffien til vi kom.
Inga er "berre" 82 år. Vi snakka om då vi var
i lag på Kanariøyane sist vinter.
Kjekt å besøkje deg, tante Inga!